អ្នកបង្កើតមាតិកា និងជាអ្នកផ្សាយផ្ទាល់វីដេអូជនជាតិអាមេរិកម្នាក់ ដែលមានឈ្មោះល្បីលើអ៊ីនធឺណិតថា Lacy បានជួបហេតុការណ៍មិននឹកស្មានដល់ ខណៈកំពុងផ្សាយផ្ទាល់ពីភោជនីយដ្ឋានមួយនៅប្រទេសជប៉ុន ដោយទទួលបានវិក្កយបត្រអាហាររហូតដល់ប្រមាណ ១២.០០០ដុល្លារអាមេរិក។
Lacy ដែលមានឈ្មោះពិតថា Nicholas Fosco បានជួបហេតុការណ៍នេះនៅថ្ងៃពុធ ទី២៨ ខែតុលា ឆ្នាំ២០២៦ ខណៈកំពុងផ្សាយផ្ទាល់តាមបណ្តាញ Twitch អំពីការទទួលទានអាហារពេលល្ងាចជាមួយដៃគូរបស់ខ្លួននៅប្រទេសជប៉ុន។
តាមព័ត៌មានដែលបានរាយការណ៍ QR កូដ សម្រាប់បញ្ជាទិញអាហារតាមប្រព័ន្ធឌីជីថលរបស់ភោជនីយដ្ឋាន បានបង្ហាញនៅលើកាមេរ៉ាក្នុងអំឡុងពេលផ្សាយផ្ទាល់។ បន្ទាប់មក អ្នកទស្សនាមួយចំនួនបានស្កេនកូដនេះពីចម្ងាយ ហើយបញ្ជាទិញអាហារក្នុងបរិមាណដ៏ច្រើនដោយមិនមានការអនុញ្ញាតពីអ្នកផ្សាយផ្ទាល់ឡើយ។
នៅពេលបុគ្គលិកភោជនីយដ្ឋានយកវិក្កយបត្រមកឱ្យ Lacy ដែលមិនបានបញ្ជាទិញអាហារទាំងនោះដោយខ្លួនឯង គាត់បានដឹងថាមានបញ្ហាកើតឡើង ហើយបានសម្រេចបិទការផ្សាយផ្ទាល់ ដើម្បីដោះស្រាយស្ថានការណ៍។
នៅថ្ងៃបន្ទាប់ គឺថ្ងៃទី២៩ ខែតុលា លោក Fosco បានបកស្រាយអំពីហេតុការណ៍នេះថា លោកបានសុំទោសដោយផ្ទាល់ទៅកាន់អ្នកគ្រប់គ្រងភោជនីយដ្ឋាន និងបានបង់ប្រាក់វិក្កយបត្រដែលមិនបានរំពឹងទុកចំនួន ១,៦លានយ៉េនជប៉ុន ឬប្រហែល១២ ០០០ដុល្លារ។ លើសពីនេះ លោកក៏បានស្នើឱ្យខាងភោជនីដ្ឋានចែករំលែកអាហារដែលបានរៀបចំលើសចំនួននោះទៅកាន់គ្រួសារផ្សេងទៀតដែលកំពុងទទួលទានអាហារនៅក្នុងភោជនីយដ្ឋាន ដើម្បីកុំឱ្យអាហារទាំងនោះខ្ជះខ្ជាយ។
ការទទួលខុសត្រូវ និងទឹកចិត្តគិតគូរដល់អ្នកដទៃរបស់លោក បានធ្វើឱ្យមានការកោតសរសើរយ៉ាងទូលំទូលាយនៅលើបណ្តាញសង្គមជប៉ុន។
ហេតុការណ៍នេះក៏ជាការរំលឹកដល់អ្នកបង្កើតមាតិកា និងអ្នកប្រើប្រាស់បណ្តាញសង្គមអំពីសារៈសំខាន់នៃការការពារព័ត៌មានបញ្ជាទិញ និងប្រព័ន្ធទូទាត់ឌីជីថលពីការប្រើប្រាស់ដោយគ្មានការអនុញ្ញាត ជាពិសេសនៅពេលកំពុងផ្សាយផ្ទាល់ជាសាធារណៈ៕
ដោយ៖ ចាន់ តារា
ប្រភព៖ Japan Daily