កាលពីថ្ងៃទី១៥ ខែកញ្ញា ឆ្នាំ២០២៦ ឯកឧត្តម ទី នីតូរ្យ អនុរដ្ឋលេខាធិការ នៃក្រសួងការបរទេស និងសហប្រតិបត្តិការអន្តរជាតិ បានដឹកនាំគណៈប្រតិភូកម្ពុជា រួមទាំង តំណាងក្រុមហ៊ុន UNI Holding ដែលដឹកនាំដោយលោក ប៉ុល ពន្លឺ អគ្គលេខាធិការនៃសមាគមវិនិយោគិន នវានុវត្តន៍ និងអភិវឌ្ឍន៍ ជួបពិភាក្សាការងារដាច់ដោយឡែកពីគ្នា ជាមួយលោក Catalin Dan ប្រធាននាយកដ្ឋានកិច្ចការបរទេស នៃសភាពាណិជ្ជកម្ម និងឧស្សាហកម្មរូម៉ានី និង លោក Octavia Stocklosa អនុប្រធានសភាពាណិជ្ជកម្ម និងឧស្សាហកម្មរដ្ឋធានីប៊ុយការេស ដោយមានការចូលរួមពីតំណាងធុរកិច្ចរូម៉ានីក្នុងវិស័យកែច្នៃកសិផល ភស្ដុភារកម្ម និងបច្ចេកវិទ្យាឌីជីថល នៅរដ្ឋធានីប៊ុយការេស ប្រទេសរូម៉ានី។
ដោយឡែកលោកស្រី ពិន ភិរម្យ អគ្គនាយិកានៃក្រុមហ៊ុន UNI Holding និងជានាយិកាប្រតិបត្តិនៃក្រុមហ៊ុន PINEX AGRO Co., Ltd. ដែលធ្លាប់បាននាំយកសក្តានុពលវិស័យស្វាយចន្ទីកម្ពុជា ទៅបង្ហាញលើឆាកអន្តរជាតិ កាលពីដើមខែសីហា ឆ្នាំ ២០២៦ កន្លងទៅក៏មានវត្តមានក្នុងដំណើរទស្សនកិច្ចនេះដែរ។
លោកស្រីពិន ភិរម្យ ពន្យល់បែបណនេះថា “កន្លងមកពេលផលិតផលយើងចង់យកទៅអឺរ៉ុប គឺឈ្មួញកណ្ដាលមកដល់កម្ពុជាផ្ទាល់ អ៊ីចឹងហើយទើបយើងមិនអាចជួបអ្នកទិញ ឬអ្នកកែច្នៃដោយផ្ទាល់ ជាលទ្ធផល តម្លៃយើងក៏បានទាប តាមហ្នឹងព្រោះគេនៅកណ្ដាលគេត្រូវការចំណេញដែរ…បើយើងបានទៅដល់អ្នកទិញផ្ទាល់ ឬវិនិយោគិនផ្ទាល់ យើងចំណេញជាង ហើយវិសាលភាពយើង អាចធំជាង ដាក់បន្ដទៅឈ្មួញ..អ៊ីចឹងហើយបានយើងមកដល់ទីនេះ ធ្វើការនេះជាមួយថ្នាក់ដឹកនាំ”។
ដោយឡែកដើម្បីបង្កើនលទ្ធភាពរុញកសិផលកម្ពុជាឲ្យលេចចេញជារូបរាងកាន់តែច្បាស់ គណៈប្រតិភូកម្ពុជា ក៏បានចួបជាមួយតំណាងរោងចក្រ ដូចគ្នាដែរដើម្បីស្វែងរក កិច្ចសហការល្អ ក្នុងការនាំផលិតផលកសិកម្មវត្ថុធាតុដើម ទៅវេចខ្ចប់នៅអឺរ៉ុបផ្ទាល់តែម្ដង។
អគ្គនាយិកានៃក្រុមហ៊ុន UNI Holding ខាងលើបានឲ្យអ្នកសារព័ត៌មានយើងដឹងទាំងអំនរបែបនេះថា “ចាស៎អូន! យើងចង់ពង្រីកទីផ្សារកសិផលខ្មែរយើងមកអឺរ៉ុបដោយផ្ទាល់ ដោយចាប់ផ្ដើមពីបណ្ដាប្រទេសដែលអាចទៅរួច…យើងចឹងយកវត្ថុធាតុដើមយើងមកវេចខ្ចប់នៅទីនេះហ្មង ជាជាងលក់ឲ្យឈ្មួញកណ្ដាល ហើយយើងនឹងចាប់ផ្ដើមពីគ្រាប់ស្វាយចន្ទី និងជាបន្តបន្ទាប់ ស្វាយ ដូចអង្ក និងផ្សេងៗទៀត។”
ដំណើរទស្សនិច្ចនេះស្ថិតក្រោមការជួយជ្រោមជ្រែងពីសំណាក់ លោក ជា ច័ន្ទបរិបូរណ៍ ឯកអគ្គរាជទូតកម្ពុជា ប្រចាំប្រទេសប៊ុលហ្គារី ប្រទេសរ៉ូម៉ានី សាធារណរដ្ឋក្រិក និងសាធារណរដ្ឋស៊ីប ដែលមាននិវេសនដ្ឋាននៅទីក្រុងសូហ្វីយ៉ា លោកថា “យើងចង់ឲ្យផលិតផលកម្ពុជា មានលក់នៅលើទីផ្សារអន្តរជាតិកាន់តែច្រើន ពិសេសនៅអឺរ៉ុប”។
ជំនួបប្រជុំខាងលើមានគោលបំណងពង្រឹងទំនាក់ទំនងសេដ្ឋកិច្ចកម្ពុជា-រូម៉ានី ឱ្យកាន់តែស៊ីជម្រៅ តាមរយៈការបង្កើតប្រព័ន្ធទំនាក់ទំនងផ្ទាល់រវាងស្ថាប័នរដ្ឋ និងវិស័យឯកជន ព្រមទាំងកំណត់ទីតាំងយុទ្ធសាស្ត្ររបស់កម្ពុជា និងរូម៉ានី ជាច្រកទ្វារសេដ្ឋកិច្ចដ៏មានសក្តានុពលឆ្ពោះទៅកាន់ទីផ្សារអាស៊ាន និងសហភាពអឺរ៉ុប ទៅវិញទៅមក។ កិច្ចពិភាក្សាបានផ្តោតលើកិច្ចសហប្រតិបត្តិការជាក់ស្តែង ក្នុងវិស័យកែច្នៃកសិផល ទេសចរណ៍ ភស្តុភារកម្ម ថាមពលកកើតឡើងវិញ និងបច្ចេកវិទ្យាឌីជីថល រួមទាំងចំណាប់អារម្មណ៍របស់ក្រុមហ៊ុន UNI Holding ក្នុងការជ្រើសរើសប្រទេសរូម៉ានី ជាមជ្ឈមណ្ឌលកែច្នៃ និងចែកចាយផលិតផលកម្ពុជា ទៅកាន់ទីផ្សារអឺរ៉ុបទាំងមូល ក៏ដូចជាចំណាប់អារម្មណ៍របស់ភាគីរូម៉ានី លើការអភិវឌ្ឍវិស័យភស្តុភារកម្ម និងបច្ចេកវិទ្យាឌីជីថលនៅកម្ពុជា។
តើដំណាំ ប៉ុន្មានមុខខាងលើនេះអាចក្លាយជាដំណាំយុទ្ធសាស្ត្រសំខាន់សម្រាប់កម្ពុជាខ្លាំងប៉ុណ្ណា? តើអាចវាទទីដល់ទីផ្សារអឺរ៉ុប ផ្ទាល់ដោយមិនពឹងផ្អែកលើឈ្មួញកណ្ដាលខ្លាំងប៉ុណ្ណា?
