តើអ្នកធ្លាប់ឆ្ងល់ទេថា តើបុគ្គលម្នាក់អាចរក្សាសុខភាពផ្លូវកាយ និងផ្លូវចិត្តឱ្យរឹងមាំរហូតដល់អាយុជាងមួយសតវត្សរ៍ដោយរបៀបណា? ក្នុងពេលដែលមនុស្សសម័យថ្មីតែងតែស្វែងរកវិធីសាស្ត្រថែទាំសុខភាពដ៏ស្មុគស្មាញ និងរបបអាហារទំនើបៗ ផ្ទុយទៅវិញ បុរសចំណាស់ជាងគេបង្អស់ក្នុងប្រទេសវែល (Wales) បានទម្លាយអាថ៌កំបាំងដ៏សាមញ្ញបំផុត ប៉ុន្តែពោរពេញដោយអត្ថន័យជ្រាលជ្រៅ ដែលគ្រប់គ្នាអាចរៀនសូត្រតាមបាន។ នេះបើតាមការផ្សាយរបស់ New York Post កាលពីចុងខែតុលា ឆ្នាំ២០២៦។
ថ្មីៗនេះ លោក Owen Filer អតីតយុទ្ធជនសង្គ្រាមលោកលើកទី២ ទើបតែប្រារព្ធខួបកំណើតគម្រប់ ១០៧ ឆ្នាំ ហើយលោកត្រូវបានគេស្គាល់ថាជាបុរសដែលមានវ័យចំណាស់ជាងគេបំផុតនៅក្នុងប្រទេសវែល។ ផ្ទុយពីការរំពឹងទុកថាបុរសអាយុវែងម្នាក់នេះត្រូវតែតមអាហារយ៉ាងតឹងរ៉ឹងនោះ លោក Filer បានទម្លាយប្រាប់សារព័ត៌មាន យ៉ាងស្មោះត្រង់ថា អាហារដែលលោកស្រឡាញ់ និងញ៉ាំជាប្រចាំដើម្បីទ្រទ្រង់កម្លាំង គឺ «ត្រីបំពង និងដំឡូងបារាំងបំពង» ដោយក្នុងមួយពេលៗ លោកតែងតែញ៉ាំដំឡូងបារាំងបំពងមួយវែកពេញ និងត្រីបំពងមួយក្បាល។
ទោះបីជាយ៉ាងណាក៏ដោយ អាថ៌កំបាំងសុខភាពដ៏សំខាន់នៅពីក្រោយការញ៉ាំអាហារបំពងនេះ គឺការចេះកំណត់កម្រិតសមស្រប ដោយលោកតាជ្រើសរើសយកប្រភេទត្រីស្រស់ល្អៗ ព្រមទាំងប្រកាន់ខ្ជាប់នូវគោលការណ៍សំខាន់មួយគឺ «មិនដែលបរិភោគលើសចំណុះ នោះឡើយ»។
ក្រៅពីចំណីអាហារដែលជាចំណូលចិត្តហើយ លោកតា Filer បានបញ្ជាក់យ៉ាងច្បាស់ថា គ្មានរូបមន្តអស្ចារ្យ ឬឱសថទិព្វអ្វីក្រៅពី «ការរស់នៅឱ្យបានត្រឹមត្រូវ» នោះឡើយ។ ពេញមួយជីវិតរបស់លោកតា មិនថាក្នុងកាលៈទេសៈណាក៏ដោយ លោកតែងតែខិតខំធ្វើការងារដោយភាពស្មោះត្រង់។ បើយោងតាមការរៀបរាប់ពីក្រុមគ្រួសារ និងមិត្តភក្តិជិតស្និទ្ធរបស់លោកតា បានឱ្យដឹងថា ទោះបីជាលោកឆ្លងកាត់សម័យកាលដ៏លំបាកវេទនាពីកុមារភាពដែលខ្វះខាតទាំងអាហារ និងប្រាក់កាសក៏ដោយ ក៏ភាពធន់ និងការតស៊ូក្នុងជីវិតបានក្លាយជាមូលដ្ឋានគ្រឹះដ៏រឹងមាំសម្រាប់សុខភាពរបស់លោក។
មិនត្រឹមតែថែទាំសុខភាពរាងកាយតាមរយៈការបរិភោគ និងការធ្វើការងារប៉ុណ្ណោះទេ ប៉ុន្តែសុខភាពផ្លូវចិត្តរបស់លោកតា Filer ក៏ជាគំរូដ៏អស្ចារ្យផងដែរ។ ចំណែកលោក Darren Foote ដែលជាអតីតយុទ្ធជនរួមជំនាន់ និងជាអ្នកជួយរៀបចំពិធីខួបកំណើតឱ្យលោក បានសម្គាល់ឃើញថា លោកតា Filer មិនដែលគិតច្រើនពីអាយុរបស់ខ្លួនឯងនោះទេ។ ជារៀងរាល់ព្រឹក លោកនៅតែរក្សាទម្លាប់ក្រោកពីដំណេកដោយភាពស្រស់ស្រាយ ពាក់អាវស្អាតបាត ពាក់ខ្សែក ស្បែកជើង និង «ក្រោកឡើងដោយមានគោលដៅច្បាស់លាស់ក្នុងជីវិត»។ ផ្នត់គំនិតវិជ្ជមាន ការមានគោលដៅជារៀងរាល់ថ្ងៃ និងការរស់នៅដោយមានសេចក្តីសុខក្នុងចិត្តនេះហើយ ដែលអ្នកជំនាញសុខភាពតែងតែលើកឡើងថា ជាកត្តាជួយកាត់បន្ថយស្ត្រេស និងពន្យារភាពចាស់ជរាបានយ៉ាងមានប្រសិទ្ធភាពបំផុត។
ការរស់នៅដល់អាយុ ១០៧ ឆ្នាំរបស់លោកតា Owen Filer មិនមែនកើតឡើងដោយចៃដន្យនោះឡើយ ប៉ុន្តែវាគឺជាផលបូកផ្សំនៃការបរិភោគដោយមានការចេះគ្រប់គ្រង ការខិតខំធ្វើការងារមិនបោះបង់ និងការរក្សាស្មារតីឱ្យមានសកម្មភាពជានិច្ច ដែលជាមេរៀនសុខភាពដ៏មានតម្លៃសម្រាប់មនុស្សគ្រប់ជំនាន់៕
ប្រភព៖ nypost.com