តើអ្នកធ្លាប់មានអារម្មណ៍ថា ទោះបីជាអ្នកខំប្រឹងធ្វើការលើសម៉ោង រហូតដល់គ្មានពេលញ៉ាំបាយជុំគ្រួសារ ឬគ្មានពេលមើលថែខ្លួនឯង ក៏អ្នកនៅតែមានអារម្មណ៍ថា«មិនទាន់គ្រប់គ្រាន់» ដែរឬទេ? នៅក្នុងយុគសម័យដែលមនុស្សគ្រប់គ្នាកាន់តែមមាញឹកខ្លាំង ស្ត្រីជាច្រើនកំពុងធ្លាក់ក្នុងអន្ទាក់នៃភាពនឿយហត់រ៉ាំរ៉ៃ។

ប៉ុន្តែ បច្ចុប្បន្នមាននិន្នាការថ្មីមួយកំពុងផ្ទុះឡើង ដែលហៅថា «មហិចតាបែបស្ងប់ស្ងាត់» (Quiet Ambition)។ នៅក្នុងអត្ថបទនេះ Kanha នឹងនាំអ្នកទាំងអស់គ្នាទៅស្វែងយល់ថា តើការមានមហិច្ឆតាបែបស្ងៀមស្ងាត់អាចជួយឱ្យអ្នកជោគជ័យក្នុងអាជីព ដោយមិនបាត់បង់សុខភាពផ្លូវចិត្តដោយរបៀបណា?

១. តួលេខដែលស្ត្រីគ្រប់រូបគួរដឹង

វាមិនមែនជារឿងចៃដន្យទេដែលស្ត្រីងាកមកចាប់អារម្មណ៍លើមហិចតាបែបស្ងប់ស្ងាត់។ យោងតាមរបាយការណ៍ Women in the Workplace 2023 របស់ស្ថាប័ន McKinsey បានបង្ហាញថា ស្ត្រីមានអត្រា «ហត់នឿយខ្លាំង» (Burnout) ខ្ពស់ជាងបុរសគួរឱ្យកត់សម្គាល់ ដោយសារតែបន្ទុកការងារទ្វេដង។ ទន្ទឹមនឹងនេះ របាយការណ៍ពី Fortune ក៏បានរកឃើញថា បុគ្គលិកជំនាន់ថ្មីប្រមាណ ៧០% លែងចង់បានតំណែងជាអ្នកគ្រប់គ្រងជាន់ខ្ពស់ទៀតហើយ ប្រសិនបើវាមកជាមួយការបាត់បង់តុល្យភាពជីវិត។ នេះសបញ្ជាក់ថា និយមន័យនៃ «ជោគជ័យ» កំពុងតែផ្លាស់ប្តូរពីការមានអំណាច មកជាការមាន«សេរីភាពនៃពេលវេលា» វិញ។

២. ហេតុអ្វីបានជា «មហិចតាបែបស្ងប់ស្ងាត់» ក្លាយជាជម្រើសវៃឆ្លាត?

មហិចតាបែបស្ងៀបស្ងាត់ មិនមែនមានន័យថាអ្នកខ្ជិល ឬគ្មានមហិច្ឆតានោះទេ ប៉ុន្តែវាគឺជាការកំណត់គោលដៅជីវិតដោយចេតនាច្បាស់លាស់។

• ការផ្ដោតលើគុណភាពជាជាងបរិមាណ៖ មហិច្ឆតាបែបស្ងប់ស្ងាត់បង្រៀនយើងឱ្យធ្វើការដោយឆ្លាតវៃដើម្បីសម្រេចលទ្ធផលដដែល ប៉ុន្តែប្រើប្រាស់ថាមពលតិចជាងមុន។
• ការចាកចេញពីសម្ពាធសង្គម៖ ស្ត្រីច្រើនតែរងសម្ពាធថាត្រូវតែ«ធ្វើបានច្រើនមុខ» ។ មហិច្ឆតាបែបស្ងប់ស្ងាត់អនុញ្ញាតឱ្យអ្នកនិយាយថា «ទេ» ចំពោះការរំពឹងទុករបស់សង្គម ដើម្បីនិយាយថា «បាទ/ចាស» ចំពោះតម្លៃពិតនៃជីវិតរបស់អ្នក។ «ជោគជ័យពិតប្រាកដ គឺការរស់នៅក្នុងជីវិតដែលអ្នកមិនចាំបាច់សុំច្បាប់សម្រាកពីវា»។

៣. ជំហានទាំង៤ដើម្បីអនុវត្ត«មហិច្ឆតាបែបស្ងប់ស្ងាត់»ក្នុងជីវិតពិត

ប្រសិនបើអ្នកចង់ផ្លាស់ប្តូរមកកាន់របៀបរស់នៅបែបនេះ សាកល្បងអនុវត្តជំហានខាងក្រោម៖

1. កំណត់ព្រំដែនឱ្យច្បាស់៖ កុំឆែកអ៊ីមែល ឬតបសារការងារក្រោយម៉ោង ៦ល្ងាច។ បង្កើត «តំបន់គ្មានការងារ» នៅក្នុងផ្ទះរបស់អ្នក។
2. ផ្ដោតលើការងារដែលមានអាទិភាពខ្ពស់៖ កំណត់ការងារដែលសំខាន់បំផុតសម្រាប់ធ្វើក្នុងមួយថ្ងៃ ហើយធ្វើវាឱ្យល្អបំផុត ជាជាងធ្វើការងារតូចតាចរាប់រយដែលមិនបានផលអ្វីច្រើន។
3. ទំនាក់ទំនងជាមួយមេកើយដោយតម្លាភាព៖ ពិភាក្សាអំពីគោលដៅអាជីពរបស់អ្នក។ បញ្ជាក់ថាអ្នកចង់រីកចម្រើនក្នុងជំនាញ ជាជាងការចង់បានតំណែងដែលត្រូវធ្វើការ២៤ម៉ោង។
4. វិនិយោគលើសុភមង្គលក្រៅការងារ៖ ចំណាយពេលរៀនសិល្បៈ ហាត់ប្រាណ ឬនៅជាមួយមនុស្សជាទីស្រឡាញ់។ សកម្មភាពទាំងនេះនឹងជួយបញ្ចូលថាមពលឱ្យអ្នកធ្វើការបានកាន់តែល្អ។

៤. ការបំបែករបាំងវប្បធម៌

នៅក្នុងបរិបទសង្គមខ្មែរ ស្ត្រីតែងតែត្រូវបានរំពឹងទុកឱ្យធ្វើជា«មេផ្ទះផង និងមេការផង»។ ការអនុវត្ត មហិច្ឆតាបែបស្ងប់ស្ងាត់ អាចនឹងជួបការលំបាកនៅដំបូងទី ដោយសារការខ្លាចគេថា «មិនខំប្រឹង»។ ប៉ុន្តែសូមចងចាំថា ការដែលអ្នកមានសុខភាពល្អ និងមានស្នាមញញឹមសម្រាប់គ្រួសារ វាមានតម្លៃជាងការផ្ញើរបាយការណ៍នៅម៉ោង១២យប់។ ស្ត្រីខ្មែរសម័យថ្មីគួរចាប់ផ្តើមជជែកជាមួយដៃគូអំពីការចែករំលែកបន្ទុកផ្ទះសម្បែង ដើម្បីឱ្យយើងម្នាក់ៗមានឱកាសរស់នៅបែប«ស្ងប់ស្ងាត់ តែរឹងមាំ»។

មហិច្ឆតាបែបស្ងប់ស្ងាត់ មិនមែនជាការបោះបង់ចោលក្តីស្រមៃទេ ប៉ុន្តែវាគឺជាការជ្រើសរើសផ្លូវដើរដែលផ្តល់និរន្តរភាពដល់ជីវិត។ នៅពេលអ្នកឈប់រត់ដេញតាមនិយមន័យជោគជ័យរបស់អ្នកដទៃ អ្នកនឹងរកឃើញជោគជ័យពិតប្រាកដដែលជារបស់អ្នកផ្ទាល់។

ប្រភព៖ Worklife / Stylist