ជាទូទៅ ក្មេងស្រីចាប់ផ្ដើមជីវិតដោយភាពរស់រវើកបំផុត។ ពួកគេពូកែនិយាយតាំងពីតូច ចូលចិត្តសង្គម និងជាសិស្សឆ្នើម។ ប៉ុន្តែនៅចន្លោះវ័យមត្តេយ្យដល់មធ្យមសិក្សា បញ្ហាសម្ពាធសង្គម ការរំពឹងទុកខ្ពស់ក្នុងថ្នាក់រៀន និងសាររំខានពីសង្គម ដូចជាត្រូវធ្វើឱ្យល្អបំផុត ប៉ុន្តែកុំធ្វើឱ្យគេចាប់អារម្មណ៍ខ្លាំងពេក ឬកូនអាចធ្វើអ្វីក៏បានដែលកូនចង់ ប៉ុន្តែសម្រស់គឺជាអាទិភាពទីមួយ ដែល​ឃ្លាទាំងនេះ​អាចធ្វើឱ្យក្មេងស្រីធ្លាក់ចុះការសិក្សា ឬបាត់បង់ភាពជឿជាក់។

ដើម្បីកសាងទំនុកចិត្ត និងភាពរឹងមាំឱ្យកូនស្រីសម្រាប់ឆ្នាំខាងមុខ ម៉ាក់​ប៉ា​អាចអនុវត្តតាមវិធីខាងក្រោម៖

១. លើកទឹកចិត្តកូន​ឱ្យហ៊ានបញ្ចេញមតិ

បង្រៀនកូនស្រីឱ្យចេះបង្ហាញពីតម្រូវការរបស់ខ្លួន​ទៅកាន់មនុស្សធំ និងចេះការពារជំហរខ្លួនឯងជាមួយមិត្តភក្តិ។ ប្រសិនបើមានក្មេងផ្សេងធ្វើមិនល្អដាក់ ត្រូវលើកទឹកចិត្តឱ្យកូន​ហ៊ាននិយាយថា «ខ្ញុំមិនចូលចិត្តរបៀបដែលអ្នកនិយាយមកកាន់ខ្ញុំបែបនេះទេ»។

២. ផ្ដល់ពាក្យសរសើរឱ្យបានច្បាស់លាស់

នៅពេលអ្នកប្រាប់កូនថា កូនឆ្លាត វានឹងមានន័យខ្លាំងណាស់ប្រសិនបើអ្នកប្រើឧទាហរណ៍ជាក់ស្តែង។ ប្រាប់កូនថា៖ «កូនមានការចងចាំល្អណាស់« ឬ «កូនពិតជាស្គាល់ពីសត្វដាយណូស័របានច្រើនមែន«។

៣. ការសរសើរត្រូវស្របតាមការពិត

ក្មេងថ្នាក់ទី៣ នឹងដឹងខ្លួនឯងថា​មិនមែនជាកំពូលអ្នកតន្ត្រី ឬជាអ្នកគំនូរដ៏ពូកែបំផុតលើលោកនោះទេ ប៉ុន្តែកូន​នឹងសប្បាយ​ចិត្តប្រសិនបើប៉ាម៉ាក់​កត់សម្គាល់ឃើញពី ការរីកចម្រើន របស់គេពីខែមួយទៅខែមួយ។

៤. ជួយឱ្យកូនយល់ពីមូលហេតុ

ពន្យល់កូនថា ប្រសិនបើកូនមិនត្រូវបានគេអញ្ជើញទៅគ្រប់កម្មវិធីខួបកំណើត ឬមិនបានចូលលេងល្បែងលោតអន្ទាក់ជាមួយគេគ្រប់ពេល វាមិនមែនជាការប្រមាថមើលងាយនោះទេ។ ពន្យល់កូន​ថា នៅពេលក្មេងម្នាក់ទៀតនិយាយថា «ឯងមិនអាចធ្វើជាមិត្តភក្តិខ្ញុំទេ» វាប្រហែលជាមកពីក្មេងនោះកំពុងមានអារម្មណ៍មិនល្អ ច្រើនជាងមកពីកំហុសរបស់កូន។

៥. លើកទឹកចិត្ត

កុំប្រញាប់ជួយកូនខ្លាំងពេកក្នុងការធ្វើកិច្ចការផ្ទះ ឬការងារផ្ទះបាយ។ ប្រសិនបើកូន​សុំជំនួយ ចូរប្រាប់ឱ្យ​កូន​សាកល្បង​ដោះស្រាយវាដោយខ្លួនឯងប្រហែល ២-៣ នាទីទៀតសិន មុននឹងអ្នកចូលជួយ។

៦. លើកទឹកចិត្តឱ្យកូនលេងកីឡា

បច្ចុប្បន្ន ក្មេងស្រីមានជម្រើសកីឡាច្រើនជាងមុន។ ប្រសិនបើកូនចង់លេងកាយសម្ព័ន្ធ ឬបាល់ទាត់ ចូរផ្ដល់ឱកាសឱ្យកូនបានសាកល្បង ដើម្បីដឹងថាខ្លួនគេអាចធ្វើអ្វីបានខ្លះ។ កុំសម្រេចចិត្តជំនួសកូនថា កីឡាណាដែលស័ក្តិសម ឬមិន​ស័ក្ដិ​សម​ជំនួស​កូន ទុក​ឲ្យ​កូន​រកវាដោយខ្លួនឯងបាន។

៧. កុំសន្មតទុកមុន

គ្រាន់តែកូនជាក្មេងស្រី មិនមែនមានន័យថាកូននឹងខ្សោយផ្នែកគណិតវិទ្យា ឬពូកែតែផ្នែកអាននោះទេ។ វាក៏មិនមែន​មានន័យថាកូន​មិនចូលចិត្តទៅស្ទូចត្រី ឬលេងកីឡាបាល់បោះដែរ។ ចូរតាមដានចំណាប់អារម្មណ៍របស់កូន​ ដើម្បីជួយពង្រឹង​ចំណុចខ្លាំង និងកែលម្អចំណុចខ្សោយ។

៨. បណ្ដុះគំនិតវិជ្ជមានចំពោះរូបរាងកាយ

នៅពេលកូនសួរថា «តើកូនស្អាតទេ?» ចូរឆ្លើយដោយភាពរីករាយថា «ចាស! កូនស្អាតណាស់»។ នៅពេលសរសើរសម្រស់ ចូរភ្ជាប់វាទៅនឹងសកម្មភាពផងដែរ ដូចជា​«កូនមើលទៅពិតជាទន់ភ្លន់ណាស់ពេលលេងកាយសម្ព័ន្ធ» ឬ «ភ្នែករបស់កូនភ្លឺថ្លាណាស់ពេលនៅលើឆាក»។ ចំពោះក្មេងស្រីដែលធំបន្តិច អ្នកគួរប្រាប់ថា រូបតារាមូដែលក្នុងទស្សនាវដ្ដី មិន​មែន​ជារូបរាងពិតប្រាកដទេ ព្រោះរូបទាំងនោះត្រូវបានគេកែច្នៃឱ្យស្អាតជ្រុលហួសពីការពិត។

៩. ត្រៀមខ្លួនចំពោះការរើសអើងភេទ

សូម្បីតែសព្វថ្ងៃ មនុស្សមួយចំនួននៅតែគិតថាក្មេងស្រីមិនអាចធ្វើរឿងខ្លះដែលក្មេងប្រុសធ្វើបាន។ ប្រសិនបើអ្នកឃើញកូនមើលរឿងដែលក្មេងស្រីនៅតែពីក្រោយ ខណៈក្មេងប្រុសជាអ្នកជួយសង្គ្រោះពិភពលោក ចូរបង្ហាញកូន និងជជែកជាមួយកូន​ថានៅក្នុងពិភពពិត រឿងរ៉ាវគឺមានភាពខុសប្លែកពីក្នុងរឿង។

១០. បង្ហាញពីគំរូស្រ្តីឆ្នើមក្នុងសង្គម

ឆ្លៀតឱកាសនៅពេលមើលព័ត៌មាន ឬអានកាសែត ដើម្បីបង្ហាញកូនថា ស្ត្រីអាចធ្វើអ្វីបានគ្រប់យ៉ាង មិនថាជា សមាជិកព្រឹទ្ធសភា អ្នករាយការណ៍ព័ត៌មានកីឡា គ្រូពេទ្យ ឬអត្តពលិក។ ការអានសៀវភៅដែលមានតួអង្គស្រ្តីរឹងមាំ គឺជាវិធីដ៏ល្អបំផុតក្នុងការបណ្ដុះគំនិតនេះ ដោយមិនចាំបាច់ប្រើការទូន្មានច្រើនពេក៕

ប្រភព៖ babycenter