អ្នកជំនាញផ្នែកអភិវឌ្ឍន៍កុមារបានអះអាងថា មាតាបិតាដែលព្យាយាមផ្តល់ឱ្យកូនតូចៗនូវក្មេងលេងចម្រុះពណ៌ សៀវភៅ និងសកម្មភាពច្រើនលើសលប់ ដោយសង្ឃឹមថានឹងជួយបង្កើនថាមពលខួរក្បាលនោះ គឺកំពុងយល់ច្រឡំហើយ។

យោងតាមសម្តីរបស់សាស្ត្រាចារ្យ Sam Wass នាយកវិទ្យាស្ថានវិទ្យាសាស្ត្រសម្រាប់វ័យកុមារនៃសាកលវិទ្យាល័យ East London បានឱ្យដឹងថា ខួរក្បាលរបស់កុមារតូចៗមិនទាន់មានសមត្ថភាពគ្រប់គ្រាន់ក្នុងការទទួលយកការជំរុញ ច្រើនពេកនោះទេ ប៉ុន្តែពួកគេនឹងលូតលាស់បានល្អជាមួយ «ភាពសាមញ្ញ និងការធ្វើដដែលៗ។

សាស្ត្រាចារ្យ Sam Wass បាននិយាយថា កាលពីប៉ុន្មានឆ្នាំមុន មានមតិយល់ឃើញថា ក្មេងៗត្រូវការការជំរុញឱ្យបានច្រើន។ អ្នកប្រហែលជាស្គាល់គំនិតបែប Baby Einstein ដែលយល់ថា កាលណាអ្នកផ្តល់ឱ្យពួកគេនូវរឿងរ៉ាវកាន់តែច្រើន ពួកគេនឹងកាន់តែរៀនសូត្របានច្រើន។ លោក​លើកឡើងថា៖ «ខ្ញុំមិនចង់ធ្វើឱ្យអ្នកខកបំណងទេ ប៉ុន្តែវិទ្យាសាស្ត្របានបង្ហាញយ៉ាងច្បាស់ថា នៅពេលពួកគេនៅក្មេង ខួរក្បាលរបស់ពួកគេមានភាពច្របូកច្របល់ខ្លាំងណាស់ ដូច្នេះអ្វីដែលពួកគេត្រូវការ គឺរឿងដែលផ្ទុយពីការជំរុញ​ច្រើនលើសលប់ទាំងនោះ។ ពួកគេត្រូវការភាពសាមញ្ញ ភាពច្បាស់លាស់ និងការធ្វើដដែលៗ។ ការធ្វើរឿងដដែលៗ ជាដដែល ជួយឱ្យពួកគេចេះទាញយកអត្ថន័យចេញពីរបស់ទាំងនោះ»។

សាស្ត្រាចារ្យ Wass បានបន្ថែមថា៖ «អ្វីដែលល្អបំផុតសម្រាប់កូន គឺការអានសៀវភៅដដែលៗឱ្យកូនស្តាប់ ឬឱ្យកូន​ចុចប៊ូតុងតែមួយនៅលើក្មេងលេង ដើម្បីឱ្យវាលោតចេញមកដដែលៗ។ យើងធ្លាប់តែគិតថា កាលណាផ្តល់ឱ្យកូនកាន់តែច្រើន កូនរៀនបានកាន់តែច្រើន។ តាមពិតទៅ វាផ្ទុយស្រឡះពីហ្នឹងតែម្តង។ ខួរក្បាលរបស់ទារក ដំណើរការបញ្ជូនព័ត៌មានយឺតជាងមនុស្សធំឆ្ងាយណាស់ ដូច្នេះពួកគេច្រើនតែខកខានព័ត៌មានលម្អិត ប្រសិនបើរឿងរ៉ាវទាំងនោះមិនត្រូវបានធ្វើឱ្យយឺត ឬធ្វើដដែលៗនោះទេ»៕

ប្រភព៖ dailymail / MSN