ចំណងរវាងម្តាយ និងកូនស្រីពិតជាមានតែមួយ ហើយមានឥទ្ធិពលយ៉ាងខ្លាំងដល់ការអភិវឌ្ឍ និងការរស់នៅក្នុងសង្គមរបស់ក្មេងស្រីពេញមួយជីវិតរបស់ពួកគេ ។ ការបង្កើនទំនាក់ទំនងផ្លូវចិត្តរវាងម្តាយ និងកូនស្រីអាចជំរុញការគាំទ្រគ្នាទៅវិញទៅមក ។ ខាងក្រោមនេះ គឺជាគំនិតមួយចំនួនដើម្បីជួយអ្នកឱ្យក្លាយជាម្តាយដ៏អស្ចារ្យសម្រាប់កូនស្រីរបស់អ្នក។

១. ធ្វើជាគំរូល្អ

អ្នកម្តាយគឺជា «កញ្ចក់» ឆ្លុះបញ្ចាំងសម្រាប់កូនស្រី។

• បង្ហាញពីភាពរឹងមាំ៖ នៅពេលអ្នកជួបបញ្ហា ចូរបង្ហាញកូនពីរបៀបដោះស្រាយដោយភាពស្ងប់ស្ងាត់ និងម៉ឺងម៉ាត់។

• ស្រឡាញ់ខ្លួនឯង៖ បើអ្នកចង់ឱ្យកូនមានទំនុកចិត្ត អ្នកត្រូវបង្ហាញឱ្យកូនឃើញថា អ្នកក៏ស្រឡាញ់ និងផ្តល់តម្លៃឱ្យខ្លួនឯងដែរ។ កុំរអ៊ូទាំរឿងរូបរាងកាយ ឬចំណុចខ្សោយរបស់អ្នកនៅចំពោះមុខកូន។ ម្តាយ គឺជាមនុស្សដ៏មានឥទ្ធិពលបំផុតសម្រាប់កូនស្រី ។ របៀបដែលអ្នកម្តាយប្រព្រឹត្តចំពោះមុខកូនស្រីភាគច្រើនជះឥទ្ធិពលដល់អាកប្បកិរិយារបស់កូន។ សូមធ្វើជាម្តាយដែលមានគម្រូល្អ មានមោទនភាព រីករាយ និងមានរូបភាពវិជ្ជមានផ្ទាល់ខ្លួន ដើម្បីផ្តល់អំណាចដល់កូនស្រី​របស់អ្នក។

២. ស្វែងយល់ពីកូនស្រី

ចាប់យកឱកាសដើម្បីនៅជាមួយកូនស្រីអ្នកឱ្យបានច្រើន ។ សូមកត់សម្គាល់ថា កូនអ្នកជាមនុស្សបែបណា ។ កត់​សម្គាល់លើ​កូន ហើយគាំទ្រដោយបើកចំហនូវការចូលចិត្ត ការមិនចូលចិត្ត និងយោបល់របស់កូន។ អ្នកមិនចាំបាច់យល់ព្រមជាមួយពួកគេទេ ប៉ុន្តែអ្នកអាចធ្វើឱ្យពួកគេមានសុពលភាពដែលបង្ហាញពីការគោរព និងផ្តល់ការអនុញ្ញាតឱ្យកូន​មាន​ម្ចាស់ការ។

៣. បង្រៀនឱ្យកូនស្គាល់ពីតម្លៃនៃខ្លួនឯង

កូនស្រីងាយនឹងរងឥទ្ធិពលពីសម្ពាធសង្គមរឿង «សម្រស់»។

• សរសើរលើសមត្ថភាពជាជាងរូបរាង៖ ជំនួសឱ្យការសរសើរថា «កូនស្អាតណាស់» អ្នកគួរដូរមកសរសើរថា «កូនពូកែណាស់» «កូនមានចិត្តល្អណាស់» ឬ «កូនព្យាយាមណាស់»។

• បង្រៀនឱ្យស្រឡាញ់រាងកាយខ្លួនឯង៖ ប្រាប់កូនថាគ្រប់គ្នាមានលក្ខណៈពិសេសរៀងៗខ្លួន ហើយសុខភាពរឹងមាំគឺសំខាន់ជាងភាពស្គមស្គាំងតាមស្តង់ដារសង្គម។

៤. ជំរុញភាពឯករាជ្យ និងភាពក្លាហាន

កុំព្យាយាមការពារកូនខ្លាំងពេក រហូតដល់កូនមិនហ៊ានធ្វើអ្វីទាំងអស់។

• អនុញ្ញាតឱ្យកូនសាកល្បង៖ បណ្តោយឱ្យកូនលេងកីឡា ធ្វើកិច្ចការផ្ទះ ឬសម្រេចចិត្តលើរឿងតូចតាចដោយខ្លួនឯង។

• បង្រៀនថា «ការបរាជ័យជារឿងធម្មតា»៖ ជំរុញឱ្យកូនហ៊ានប្រថុយ និងហ៊ានធ្វើរឿងថ្មីៗ។ ប្រាប់កូនថា បើធ្វើមិនបានល្អ ក៏មិនមែនជាបញ្ហាដែរ សំខាន់គឺយើងបានរៀនពីវា។

៥. បង្កើតទំនាក់ទំនងផ្អែកលើ «ការជឿជាក់»

កូនស្រីត្រូវការបង្អែកផ្លូវចិត្តដ៏រឹងមាំម្នាក់។

• ធ្វើជាអ្នកស្តាប់ដ៏ល្អ៖ នៅពេលកូននិយាយរឿងអ្វីមួយ ចូរឈប់ធ្វើការងារផ្សេង រួចស្តាប់កូនដោយយកចិត្តទុក​ដាក់​។ កុំទាន់អាលវិនិច្ឆយ ឬស្តីបន្ទោសភ្លាមៗ។

• ផ្តល់សុវត្ថិភាពផ្លូវចិត្ត៖ ធ្វើឱ្យកូនមានអារម្មណ៍ថា «មិនថាមានរឿងអ្វីកើតឡើង អ្នកម្តាយនឹងនៅក្បែរជានិច្ច»។ នៅពេលកូនមានអារម្មណ៍សុវត្ថិភាព គេនឹងមិនលាក់បាំងរឿងសម្ងាត់ពីអ្នកឡើយ។

៦. បង្រៀនអំពី «ព្រំដែន» និងការការពារខ្លួន

នេះជាចំណុចសំខាន់បំផុតសម្រាប់សុវត្ថិភាពកូនស្រី។

• បង្រៀនឱ្យចេះពាក្យថា «ទេ»៖ ប្រាប់កូនថា គេមានសិទ្ធិបដិសេធចំពោះអ្វីដែលគេមិនពេញចិត្ត ឬអ្វីដែលធ្វើឱ្យគេមាន​អារម្មណ៍ថាមិនសុវត្ថិភាព ទោះជាជាមួយមនុស្សស្និទ្ធស្នាលក៏ដោយ។

• យល់ដឹងពីសិទ្ធិលើរាងកាយ៖ បង្រៀនកូនឱ្យស្គាល់ពីផ្នែកឯកជននៃរាងកាយ និងមិនអនុញ្ញាតឱ្យអ្នកណាម្នាក់​មក​ប៉ះពាល់ដោយគ្មានការអនុញ្ញាត។

៧. បណ្តុះចំណេះដឹងផ្នែកហិរញ្ញវត្ថុ

ភាពឯករាជ្យផ្នែកហិរញ្ញវត្ថុ គឺជាគ្រឹះនៃសេរីភាពរបស់ស្ត្រី។

• បង្រៀនកូនឱ្យចេះសន្សំ ចេះចាយវាយចំគោលដៅ និងយល់ពីតម្លៃនៃការរកប្រាក់ដោយខ្លួនឯង តាំងពីក្មេង។

ការចិញ្ចឹមកូនស្រី មិនមែនជាការដាក់កូនក្នុងទូកញ្ចក់ឡើយ ប៉ុន្តែគឺជាការបំពាក់ «ស្លាប» ឱ្យកូន ដើម្បីឱ្យគេអាច​ហោះ​ហើ​រ​ដោយទំនុកចិត្តក្នុងសង្គម​។ អ្វីដែលកូនស្រីត្រូវការបំផុតពីអ្នកម្តាយ គឺសេចក្តីស្រឡាញ់ដែលគ្មានលក្ខខណ្ឌ និងការផ្តល់​កម្លាំងចិត្ត ដើម្បីឱ្យគេមាន​ម្ចាស់ការ​លើ​ខ្លួនឯង​ពិត​ប្រាកដ​៕

ប្រភព៖ Focus on the Family / PBS