ការពពោះដែល «មិនចាញ់» ញ៉ាំបាន គេងលក់ និងមានកម្លាំងមាំមួន​ជារឿងដែលស្ត្រីគ្រប់រូបប្រាថ្នាចង់បាន។ ចាស់ៗបុរាណជឿថា​ការ​មិនចាញ់​ពេល​មាន​ផ្ទៃ​ពោះ​មកពីកូនក្នុងផ្ទៃ «ជាកូនស្លូត»ឬ «កូនផ្តល់លាភ» ប៉ុន្តែបើតាមបែបវិទ្យាសាស្ត្រ ការ​មិន​ចាញ់​មានមូលហេតុសំខាន់ៗមួយចំនួន។

១. ការបន្សាំខ្លួនបានយ៉ាងល្អទៅនឹងការប្រែប្រួលអ័រម៉ូន

មូលហេតុចម្បងដែលធ្វើឱ្យស្ត្រីភាគច្រើន «ចាញ់កូន» គឺដោយសារការកើនឡើងយ៉ាងគំហុកនៃអ័រម៉ូន hCG (human Chorionic Gonadotropin) និងអរម៉ូន Estrogen។ ចំពោះស្ត្រីដែលមិនចាញ់ អាចមកពី​រាងកាយរបស់គាត់មានសមត្ថភាពខ្ពស់ក្នុងការបន្សាំខ្លួន​ទៅនឹងការប្រែប្រួលអ័រម៉ូនទាំងនេះបានយ៉ាងរហ័ស។ កម្រិតអរម៉ូនកើនឡើងក្នុងកម្រិតមួយដែលរាងកាយរបស់គាត់អាចទ្រាំទ្របានដោយមិនបង្កឱ្យមានការប៉ះពាល់ដល់ប្រព័ន្ធរំលាយអាហារ ឬខួរក្បាលដែលបញ្ជាឱ្យក្អួត។

២. សុខភាពផ្លូវចិត្ត និងប្រព័ន្ធប្រសាទមាំមួន

ការសិក្សាបានបង្ហាញថា ស្ថានភាពផ្លូវចិត្តដើរតួនាទីយ៉ាងសំខាន់។ ស្ត្រីដែលមិនសូវមានសម្ពាធ មានអារម្មណ៍សប្បាយរីករាយ និងទទួលបានការយកចិត្តទុកដាក់ខ្ពស់ពីគ្រួសារ ច្រើនតែមានអាការៈពពោះល្អ​ប្រសើរ និងស្រួលខ្លួន។ នៅពេលដែលប្រព័ន្ធប្រសាទមានភាពស្ងប់ស្ងាត់ វាក៏កាត់បន្ថយការជំរុញឱ្យមានការចង្អោរ ឬវិលមុខផងដែរ។

៣. កម្រិតជីវជាតិ និងវីតាមីនក្នុងរាងកាយគ្រប់គ្រាន់

ស្ត្រីដែលមានសុខភាពល្អតាំងពីមុនពពោះ និងមានកម្រិតវីតាមីន B6 ក្នុងរាងកាយគ្រប់គ្រាន់ ច្រើនតែមិនជួបប្រទះការចាញ់កូនធ្ងន់ធ្ងរឡើយ។ ការដែលគាត់ «ញ៉ាំបានគេងបាន» បង្ហាញថាប្រព័ន្ធរំលាយអាហារ និងការដុតរំលាយអាហារក្នុងរាងកាយដំណើរការបានយ៉ាងល្អប្រសើរ។

៤. កត្តាហ្សែន

ប្រសិនបើម្តាយ ឬបងប្អូនស្រីរបស់យើង​ធ្លាប់មានប្រវត្តិពពោះដោយមិនចាញ់ នោះម៉ាក់ៗ​ក៏មានឱកាសខ្ពស់ក្នុងការមានបទពិសោធស្រដៀងគ្នានេះដែរ។ ហ្សែនដើរតួនាទីក្នុងការកំណត់ពីរបៀបដែលរាងកាយឆ្លើយតបទៅនឹងការមានផ្ទៃពោះ។

៥. ប្រព័ន្ធភាពស៊ាំរឹងមាំ

រាងកាយរបស់ស្ត្រីខ្លះចាត់ទុកទារកក្នុងផ្ទៃជា «វត្ថុចម្លែក» ដែលនាំឱ្យមានការប្រឆាំង និងបង្កជាការចាញ់។ ប៉ុន្តែចំពោះស្ត្រីដែលមានប្រព័ន្ធភាពស៊ាំរឹងមាំ វានឹងរៀនបន្សាំខ្លួន និងទទួលយកវត្តមានទារកដោយសន្តិវិធី ដែលធ្វើឱ្យអ្នកម្តាយមិនមានអាការៈវិលមុខ ឬក្អួតចង្អោរ។

ចំណុចគួរកត់សម្គាល់៖ តើមិនចាញ់កូន បង្ហាញថាកូនមិនមានសុខភាពល្អមែនទេ? ចម្លើយគឺ ទេ! នេះគឺជាជំនឿខុសឆ្គងមួយ។ ការមិនចាញ់កូន មិនមែនមានន័យថាកូនមិនលូតលាស់នោះទេ។ វាគ្រាន់តែមានន័យថា រាងកាយរបស់អ្នកម្តាយមានតុល្យភាពល្អឥតខ្ចោះក្នុងការឆ្លើយតបនឹងការមានផ្ទៃពោះតែប៉ុណ្ណោះ។

ទោះបីជាអ្នកម្តាយមានអារម្មណ៍ថាស្រួលខ្លួន ញ៉ាំបាន និងគេងលក់ធម្មតាក៏ដោយ ក៏ការទៅពិនិត្យផ្ទៃពោះតាមកាលកំណត់នៅតែជារឿងចាំបាច់បំផុត ដើម្បីតាមដានការលូតលាស់របស់ទារក និងពិនិត្យមើលកម្រិតជាតិស្ករ ឬ​សម្ពាធឈាមឱ្យបានទៀងទាត់។

ប្រភព៖ Parents / healthline