មកដល់ដំណាក់កាលពិនិត្យសុខភាពក្រោយសម្រាល ម៉ាក់ៗ និងប៊េប៊ីមានសុខភាពកាន់តែប្រើសើរហើយ។ ការពិនិត្យសុខភាពក្រោយសម្រាល ជាជំហានចុងក្រោយនៃដំណើរការសម្រាល និងជាជំហានដំបូងនៃការថែទាំសុខភាពរយៈពេលវែង។

ខាងក្រោមនេះគឺជាបញ្ជីសំណួរ និងគន្លឹះបំបៅដោះកូនដែលដកស្រង់ចេញពីស្ថាប័ន ACOG (មហាវិទ្យាល័យសម្ភព និងរោគស្ត្រីអាមេរិក) និងអង្គការសុខភាពពិភពលោក(WHO)។

១. បញ្ជីសំនួរសម្រាប់ត្រៀមសួរគ្រូពេទ្យ

អ្នកជំនាញមកពី ACOG ណែនាំឱ្យមានការពិនិត្យសុខភាពក្នុងរយៈពេល ៣ សប្តាហ៍ ដំបូងក្រោយសម្រាល និងការពិនិត្យពេញលេញនៅសប្តាហ៍ទី ៦ ឬតាមការណែនាំរបស់គ្រូពេទ្យពេលម៉ាក់ចេញពីមន្ទីរពេទ្យក្រោយសម្រាល។

• ការជាសះស្បើយ៖ តើមុខរបួស (វះកាត់/ដេរ) របស់ខ្ញុំជាសះស្បើយធម្មតាដែរឬទេ? តើឈាមដែលធ្លាក់មកនេះជាសញ្ញាធម្មតាឬ?
• ការពន្យារកំណើត៖ ពេលណាទើបខ្ញុំអាចរួមភេទវិញបាន? តើវិធីសាស្ត្រពន្យារកំណើតណាដែលល្អសម្រាប់ស្រ្តីបំបៅដោះកូន?
• សុខភាពផ្លូវចិត្ត៖ ខ្ញុំមានអារម្មណ៍ថា [រៀបរាប់ពីអារម្មណ៍] តើនេះជាសញ្ញានៃការបាក់ទឹកចិត្តក្រោយសម្រាលដែរឬទេ?
• សកម្មភាពរាងកាយ៖ តើខ្ញុំអាចចាប់ផ្តើមហាត់ប្រាណ ឬលើករបស់ធ្ងន់បាននៅពេលណា?
• ការបំបៅដោះ៖ ខ្ញុំមានការឈឺចាប់ពេលកូនបៅ ឬខ្វះទឹកដោះ តើគួរដោះស្រាយបែបណា?

២. គន្លឹះបំបៅដោះកូនសម្រាប់អ្នកម្តាយថ្មីថ្មោង

យោងតាម អង្គការ UNICEF និង WHO ការបំបៅដោះកូនដោយទឹកដោះម្តាយតែមួយមុខគត់ក្នុងរយៈពេល៦ ខែដំបូង គឺជាការផ្តល់នូវអាហារូបត្ថម្ភល្អបំផុតសម្រាប់កូន។

ការឱ្យកូនបៅត្រូវតាមបច្ចេកទេស នឹងជួយការពារកុំឱ្យម្តាយឈឺដោះ និងកូនទទួលបានទឹកដោះគ្រប់គ្រាន់។ ប្រសិនបើបៅត្រូវយើងនឹងឮសំឡេងកូនលេបទឹកដោះ មិនមែនសម្លេងខ្យល់ ជញ្ជក់ឡើយ។

ការប្តូរក្បាច់បំបៅជួយឱ្យកូនទទួលបានទឹកដោះពីគ្រប់ផ្នែកនៃដោះ និងកាត់បន្ថយការឈឺចុកចាប់ខ្នង ៖

• ក្បាច់បី៖ កូនគេងលើកំភួនដៃម្តាយ។
• បីឱបបាល់៖ សមស្របសម្រាប់អ្នកម្តាយសម្រាលដោយវះកាត់ (មិនឱ្យកូនប៉ះពោះ)។
• ដេកចំហៀង៖ ងាយស្រួលសម្រាប់បំបៅពេលយប់ ឬពេលម្តាយចង់សម្រាក។

៣. ការបញ្ជាក់បន្ថែមពីអ្នកជំនាញ

• WHO៖ ណែនាំឱ្យបំបៅដោះកូនភ្លាមក្នុងរយៈពេល ១ម៉ោងដំបូង ក្រោយសម្រាល ដើម្បីទទួលបានទឹកដោះដំបូង (Colostrum) ដែលសម្បូរទៅដោយអង់ទីគ័រការពារជំងឺ។
• La Leche League International៖ បញ្ជាក់ថា ការបំបៅដោះកូនមិនគួរមានការឈឺចាប់ខ្លាំងរហូតស្រក់ទឹកភ្នែកនោះទេ។ ប្រសិនបើឈឺខ្លាំង មានន័យថាបច្ចេកទេសនៃការបៅមិនទាន់ត្រឹមត្រូវ អ្នកគួរស្វែងរកជំនួយពីឆ្មប ឬគ្រូពេទ្យ។

ម៉ាក់ៗកុំភ្លេចញ៉ាំទឹកឱ្យបានច្រើន និងសម្រាកឱ្យបានគ្រប់គ្រាន់តាមដែលអាចធ្វើទៅបាន ព្រោះសុខភាពម្តាយរឹងមាំ ទើបមានកម្លាំងថែទាំកូនបានល្អ។

ប្រភព៖ WHO / UNICEF