បន្ទាប់ពីឆ្លងកាត់ការសម្រាលកូនដ៏នឿយហត់ រាងកាយរបស់ម៉ាក់ៗត្រូវការពេលវេលាដើម្បីសម្រាក និងស្តារកម្លាំងឡើងវិញ។ យោងតាមអត្ថបទអប់រំពីគេហទំព័រ The Bump និងការបញ្ជាក់បន្ថែមពីអ្នកជំនាញសុខភាព នេះសំនួរចម្លើយចំនួនប្រាំដែលម៉ាក់ៗទើបសម្រាលកូន ឬត្រៀមសម្រាចចង់ដឹង។

១. តើនៅពេលណាទើបយលងអាចកាន់ឬឱបកូនបាន?

ជាទូទៅ អ្នកម្តាយអាចឱបកូនបានភ្លាមៗបន្ទាប់ពីសម្រាល ប្រសិនបើគ្មានបញ្ហាសុខភាពបន្ទាន់ណាមួយ។ ការប៉ះពាល់រវាងស្បែក និងស្បែកភ្លាមៗក្រោយសម្រាលមានសារៈសំខាន់ខ្លាំងណាស់។ យោងតាម បណ្ឌិត្យសភាសម្ភពអាមេរិក (AAP) ការប៉ះស្បែកនិងស្បែករវាងម្ដាយ និងកូនជួយឱ្យទារកមានស្ថិរភាពចង្វាក់បេះដូង សីតុណ្ហភាពរាងកាយ និងជួយឱ្យការបំបៅដោះកូនដំបូងកាន់តែរលូន។

សម្រាប់ម៉ាក់ៗដែលសម្រាលដោយវះកាត់ អាចនឹងត្រូវរង់ចាំបន្តិចរហូតដល់ឥទ្ធិពលថ្នាំស្ពឹកថយចុះ ប៉ុន្តែក៏នៅតែអាចប៉ះពាល់កូនបានក្រោមការជួយពីគ្រូពេទ្យ។

២. តើនៅពេលណាទើបយើងអាចចេញពីមន្ទីរពេទ្យ?

រយៈពេលនៃការស្នាក់នៅមន្ទីរពេទ្យអាស្រ័យលើស្ថានភាពសុខភាព វិធីសាស្ត្រសម្រាល ដោយផ្អែកតាមការវាយតម្លៃរបស់គ្រូពេទ្យ។

• សម្រាលតាមធម្មជាតិ៖ ជាទូទៅគឺចន្លោះពី ២៤ ទៅ ៤៨ ម៉ោង។
• សម្រាលដោយវះកាត់៖ អាចត្រូវការពេលពី ៣ ទៅ ៤ ថ្ងៃ ដើម្បីតាមដានមុខរបួស ឬអាចយូរជាងនេះអាស្រ័យលើស្ថានភាពសុខភាពជាក់ស្ដែង។

មហាវិទ្យាល័យសម្ភព និងរោគស្ត្រីអាមេរិក (ACOG) បញ្ជាក់ថា ការត្រឡប់ទៅផ្ទះត្រូវផ្អែកលើស្ថិរភាពនៃសម្ពាធឈាមរបស់ម្តាយ និងពេលទារកអាចបៅដោះបានល្អ។

៣. តើនៅពេលណាទើបយើងអាចងូតទឹកបាន?

ចំពោះការងូតទឹកដោយទឹកផ្កាឈូក អ្នកអាចធ្វើបានភ្លាមៗនៅថ្ងៃបន្ទាប់ ប៉ុន្តែការ "ត្រាំទឹក" ក្នុងអាង គឺខុសគ្នា៖

• ពេលវេលា៖ គ្រូពេទ្យភាគច្រើនណែនាំឱ្យរង់ចាំរហូតដល់ ៦ សប្តាហ៍ ក្រោយសម្រាល។
• ហេតុផល៖ ដើម្បីការពារការឆ្លងមេរោគចូលក្នុងស្បូន ឬមុខរបួសដែលមិនទាន់ជាសះស្បើយល្អ (ទាំងរបួសទ្វារមាស ឬមុខរបួសវះកាត់)។ អ្នកគួរពិភាក្សាជាមួយគ្រូពេទ្យក្នុងអំឡុងពេលពិនិត្យសុខភាពក្រោយសម្រាលលើកដំបូង។

៤. តើនៅពេលណាទើបយើងអាចញ៉ាំកាហ្វេបាន?

អ្នកម្តាយអាចញ៉ាំកាហ្វេបាន ភ្លាមៗ ប៉ុន្តែត្រូវមានកម្រិត ប្រសិនបើអ្នកបំបៅដោះកូន។

• កម្រិតណែនាំ៖ យោងតាម អង្គការសុខភាពពិភពលោក (WHO) និង AAP ស្រ្តីបំបៅដោះកូនគួរញ៉ាំជាតិកាហ្វេអ៊ីនមិនឱ្យលើសពី២០០ ទៅ៣០០ មីលីក្រាម ក្នុងមួយថ្ងៃ (ប្រហែល ១ ទៅ ២ ពែងតូច)។
• សញ្ញាត្រូវតាមដាន៖ ប្រសិនបើទារកហាក់ដូចជាពិបាកគេង ឬមួម៉ៅខ្លាំងក្រោយអ្នកញ៉ាំកាហ្វេ អ្នកគួរតែកាត់បន្ថយវា។ មួយវិញទៀត ម៉ាក់ៗមិនគួរញ៉ាំកាហ្វេមុនពេលបំបៅដោះទេ គួរញ៉ាំក្រោយបំបៅដោះកូនរួច។

៥. តើនៅពេលណាទើបយើងអាចហាត់ប្រាណបាន?

ការវិលត្រឡប់ទៅរកសកម្មភាពរាងកាយវិញត្រូវធ្វើឡើងដោយសន្សឹមៗ ឬអនុវត្តតាមការណែនាំរបស់គ្រូពេទ្យ៖

• ការដើរល្មមៗ៖ អ្នកអាចចាប់ផ្តើមដើរបានក្នុងរយៈពេល ពីរបីថ្ងៃ ក្រោយសម្រាល (បើគ្មានផលវិបាក) ដើម្បីជួយឱ្យចរន្តឈាមរត់បានល្អ និងកាត់បន្ថយហានិភ័យនៃកំណកឈាម។
• ការហាត់ប្រាណខ្លាំង៖ ជាទូទៅត្រូវរង់ចាំរហូតដល់ ៦សប្តាហ៍ និងត្រូវមានការអនុញ្ញាតពីគ្រូពេទ្យ។

បើតាមស្ថាប័ន ACOG ការហាត់ប្រាណក្រោយសម្រាលជួយកាត់បន្ថយស្ត្រេស និងការពារជំងឺបាក់ទឹកចិត្តក្រោយសម្រាល ប៉ុន្តែ ការតាមដានស្ថានភាពរាងកាយជាក់ស្ដែងគឺជារឿងសំខាន់បំផុត។

ដំណើរការនៃការជាសះស្បើយរបស់ស្រ្តីម្នាក់ៗមានលក្ខណៈខុសៗគ្នា។ ការអនុវត្តតាមការណែនាំរបស់គ្រូពេទ្យជំនាញ និងការផ្តល់ពេលវេលាឱ្យរាងកាយសម្រាក គឺជាគន្លឹះនៃសុខភាពមាំមួនរយៈពេលវែង។

ប្រភព៖ The Bump / ACOG