របួសគ្រាំទ្រូង និងសួត គឺជាការប៉ះទង្គិចដ៏គួរឱ្យព្រួយបារម្ភមួយ ដែលអាចប៉ះពាល់ដល់សរីរាង្គសំខាន់ៗក្នុងទ្រូង ដូចជា សួត បេះដូង និងសរសៃឈាមធំៗ។ បញ្ហានេះអាចកើតឡើងពីរបួសស្រាល រហូតដល់របួសធ្ងន់ធ្ងរ ដែលគ្រោះថ្នាក់ដល់អាយុជីវិត ប្រសិនបើមិនទទួលបានសង្គ្រោះបន្ទាន់ និងការព្យាបាលត្រឹមត្រូវ។

១. អ្វីទៅជារបួសគ្រាំទ្រូងនិងសួត?

របួសគ្រាំទ្រូង-សួត គឺជារបួសប៉ះទង្គិចនៃតំបន់ទ្រូង ដែលអាចប៉ះពាល់ដល់ស្បែក សាច់ដុំ ទ្រូង រហូតដល់សរីរាង្គខាងក្នុង។ ភាគច្រើន វាអាចជាករណីគ្រោះថ្នាក់ធ្ងន់ ដែលមានហានិភ័យដល់ជីវិត និងត្រូវការថែទាំយ៉ាងប្រុងប្រយ័ត្នក្នុងមន្ទីរពេទ្យ។

២. មូលហេតុ

តាមការសិក្សា ករណីរបួសគ្រាំទ្រូង-សួតភាគច្រើនកើតឡើងដោយ៖

• គ្រោះថ្នាក់ចរាចរណ៍
• គ្រោះថ្នាក់ទូទៅផ្សេងៗដូចជា ជម្លោះ គ្រោះថ្នាក់ការងារ និងគ្រោះថ្នាក់នៅផ្ទះ

៣. ក្រុមមនុស្សដែលប្រឈមមុខខ្លាំងជាងគេ

• អាយុក្រោម ៥០ ឆ្នាំ
• ក្នុងចំណោមអ្នករងរបួសទាំងអស់ មានមួយភាគធំមានរបួសផ្សំ ដែលបន្ថែមហានិភ័យដល់ជីវិត៖
  • របួសក្បាល
  • បាក់ឆ្អឹង និងរបួសសាច់ដុំ និង
  • របួសសរីរាង្គក្នុងពោះ

៤. រោគសញ្ញាដែលត្រូវប្រុងប្រយ័ត្ន

• ឈឺចាប់ត្រង់កន្លែងប៉ះទង្គិច
• ដកដង្ហើមញាប់ ឬលំបាក
• ស្លេកស្លាំង / ថប់ដង្ហើម
• រោគសញ្ញារួមផ្សំ៖
• ហើមមុខ ឬទ្រូងដោយខ្យល់ចូលក្រោមស្បែក
• បែកញើសខ្លាំង
• អ្នកជំងឺឡេះឡះ ឬសន្លប់

៥. ផលវិបាកដែលអាចកើតឡើង

• សម្ពាធឈាមធ្លាក់
• អុកស៊ីសែនក្នុងឈាមចុះ
• សន្លប់ ឬដង្ហើមខ្លាំង ផលវិបាកទាំងនេះអាចជាគ្រោះថ្នាក់ដល់អាយុជីវិតបានក្នុងរយៈពេលខ្លី ប្រសិនបើមិនបានសង្គ្រោះភ្លាមៗ។

៦. វិធីរោគវិនិច្ឆយ

• ការពិនិត្យគ្លីនិក
• ការថតឆ្លុះ ទ្រូង-សួត
• ការថតឆ្លុះអេកូ ស្រោមសួត
• ការថតស្កែនន័រ ទ្រូង-សួត ក្រោយធ្វើវិនិច្ឆយគ្រូពេទ្យនឹងព្យាបាលតាមបច្ចេកទេសវេជ្ជសាស្រ្តសមស្រមទៅតាមស្ថានភាពរបស់អ្នកជំងឺជាក់ស្ដែង។

៧. វិធីការពារ

• គោរពច្បាប់ចរាចរណ៍
• កុំបើកបរក្រោមឥទ្ធិពលគ្រឿងស្រវឹង
• ប្រសិនបើមានសញ្ញារបួសគ្រាំទ្រូង-សួត ត្រូវទៅពិគ្រោះវេជ្ជបណ្ឌិតឯកទេសភ្លាមៗ
• ចាំថា របួសទ្រូង-សួតគ្រប់ប្រភេទអាចបង្កគ្រោះថ្នាក់ដល់ជីវិត។

ប្រភព៖ មន្ទីរពេទ្យកាល់ម៉ែត