ការផ្លាស់ប្តូរពីវិទ្យាល័យទៅមហាវិទ្យាល័យទាមទារឱ្យសិស្សានុសិស្សកែប្រែទម្លាប់នៃការសិក្សាទាំងស្រុង ដើម្បីសម្របខ្លួនទៅនឹងបរិយាកាសថ្មីដែលទាមទារឯករាជ្យភាពខ្ពស់។ ខាងក្រោមនេះជាគន្លឹះសំខាន់ៗដើម្បីជួយអ្នកឱ្យទទួលបានជោគជ័យក្នុងការសិក្សានៅថ្នាក់ឧត្តមសិក្សា។
ការគ្រប់គ្រងពេលវេលាដោយខ្លួនឯង
- នៅវិទ្យាល័យ គ្រូតែងតែរំលឹកពីកិច្ចការផ្ទះ ឬថ្ងៃប្រឡង ប៉ុន្តែនៅសាកលវិទ្យាល័យ អ្នកត្រូវទទួលខុសត្រូវរៀបចំកាលវិភាគផ្ទាល់ខ្លួន។
- គួរប្រើប្រាស់សៀវភៅកត់ត្រា (Planner) ឬកម្មវិធីឌីជីថលដើម្បីកត់ត្រាថ្ងៃប្រគល់កិច្ចការ (Deadlines) ម៉ោងរៀន និងម៉ោងស្វ័យសិក្សាឱ្យបានច្បាស់លាស់។
ការសិក្សាស្រាវជ្រាវក្រៅម៉ោងសិក្សា
- ការរៀននៅក្នុងថ្នាក់មានត្រឹមតែប្រមាណ ៣០% ប៉ុណ្ណោះ ចំណែក ៧០% ទៀតគឺទាមទារឱ្យអ្នកអានសៀវភៅបន្ថែម ស្រាវជ្រាវឯកសារក្នុងបណ្ណាល័យ ឬតាមប្រព័ន្ធអ៊ីនធឺណិត។
- កុំពឹងផ្អែកតែលើស្លាយ (Slides) ឬឯកសារសង្ខេបរបស់សាស្ត្រាចារ្យ ត្រូវអានសៀវភៅគោលឱ្យបានស៊ីជម្រៅ។
ការកត់ត្រាមេរៀនប្រកបដោយប្រសិទ្ធភាព
- សាស្ត្រាចារ្យភាគច្រើនពន្យល់មេរៀនលឿន ហើយមិនសរសេរគ្រប់យ៉ាងនៅលើក្តារខៀន ឬស្លាយនោះទេ។
- អ្នកត្រូវអនុវត្តវិធីសាស្ត្រកត់ត្រាឆ្លាតវៃផ្ទាល់ខ្លួន ដោយសរសេរតែចំណុចសំខាន់ៗ ពាក្យគន្លឹះ និងសេចក្តីសន្និដ្ឋាន ជាជាងការចម្លងគ្រប់ពាក្យពេចន៍។
ការចូលរួមក្នុងថ្នាក់ និងការធ្វើការងារក្រុម
- បរិយាកាសមហាវិទ្យាល័យផ្តោតខ្លាំងលើការពិភាក្សា និងគម្រោងស្រាវជ្រាវជាក្រុម (Group Work)។
- ត្រូវហ្វឹកហាត់ជំនាញទំនាក់ទំនង ហ៊ានបញ្ចេញមតិ សួរសំណួរ និងចេះបែងចែកការងារគ្នាឱ្យបានច្បាស់លាស់ជាមួយសមាជិកក្រុមដើម្បីទទួលបានលទ្ធផលល្អ។
ការស្វែងរកជំនួយនៅពេលចាំបាច់
- កុំលាក់ការសង្ស័យនៅពេលអ្នកតាមមេរៀនមិនទាន់។
- ប្រើប្រាស់ម៉ោងពិគ្រោះយោបល់ របស់សាស្ត្រាចារ្យដើម្បីសួរសំណួរបន្ថែម ឬបង្កើតក្រុមសិក្សាជាមួយមិត្តរួមថ្នាក់ដើម្បីជួយពន្យល់ និងពិភាក្សាគ្នាទៅវិញទៅមក។
ភាពជោគជ័យនៅមហាវិទ្យាល័យមិនមែនពឹងផ្អែកលើភាពឆ្លាតវៃពីកំណើតតែមួយមុខនោះទេ ប៉ុន្តែវាទាមទារនូវវិន័យផ្ទាល់ខ្លួន និងការប្តេជ្ញាចិត្តខ្ពស់ក្នុងការលះបង់ទម្លាប់ចាស់។ ការចាប់ផ្តើមអនុវត្តវិធីសាស្ត្រទាំងនេះតាំងពីដើមឆ្នាំទីមួយ នឹងជួយកាត់បន្ថយភាពតានតឹង និងបង្កើតមូលដ្ឋានគ្រឹះដ៏រឹងមាំសម្រាប់ដំណើរការសិក្សារបស់អ្នក៕
អត្ថបទ៖ សែន តុលា
ប្រភព៖ St. John’s University
