ជំងឺភ្នែកស្ងួត អាចកើតមានលើមនុស្សគ្រប់វ័យ។ ជំងឺនេះកើតមានប្រហែល៥ទៅ៣៥ភាគរយនៃប្រជាជនទូទាំងពិភពលោក ហើយប្រជាជនអាស៊ីមានអត្រាខ្ពស់ជាងគេប្រហែល៣៣ភាគរយ។ ភាគច្រើនកើតមានលើអ្នកមានអាយុចាប់ពី៥០ឆ្នាំឡើង និងកើតច្រើនលើមនុស្សស្រីច្រើនជាងមនុស្សប្រុស។

នៅក្នុងអត្ថបទនេះនឹងធ្វើការបង្ហាញពីរោគសញ្ញា ក៏ដូចជាមូលហេតុដែលបណ្ដាលឲ្យកើតជំងឺមួយនេះ៖

១. រោគសញ្ញា៖

• មានអារម្មណ៍ដូចឈឺចាក់ៗក្នុងភ្នែក
• ក្រហាយក្នុងភ្នែក
• រមាស់ក្នុងភ្នែក
• មានអារម្មណ៍ដូចមានគ្រាប់ខ្សាច់ក្នុងភ្នែក
• មានការឈឺចាប់ខ្លះ
• ស្រវាំងភ្នែក
• ចាញ់ពន្លឺថ្ងៃ
• ហៀរទឹកភ្នែក

២. កត្តាប្រឈមនាំឲ្យ​មាន​បញ្ហាភ្នែកស្ងួត

• កត្តាជាច្រើនដែលមាននៅលើផ្ទៃភ្នែក
• បណ្តាមកពីការខ្វះលំហូរទឹកភ្នែក និងអមជាមួយបញ្ហាភ្នែកមួយចំនួនទៀត
• លំហូរទឹកភ្នែកគ្មានលំនឹង
• មានរលាកផ្ទៃគ្រាប់ភ្នែក
• មានការខូចខាតប្រព័ន្វប្រសាទនៃការបង្កើតទឹកភ្នែក ដែលមានតួនាទីក្នុងការធានាទឹកភ្នែកនៅលើផ្ទៃគ្រាប់ភ្នែក។

៣. មូលហេតុដែលនាំឲ្យមានជំងឺភ្នែកស្ងួត

• មានទឹកភ្នែកមិនគ្រប់គ្រាន់ដោយសារខ្វះខាតទឹកភ្នែកបណ្តោះអាសន្ន
• អ្នកជំងឺមានទឹកភ្នែកធម្មតាតែទឹកភ្នែកនោះគ្មានគុណភាព
• បណ្តាលមកពីមានការរលាករ៉ាំរ៉ៃនៃត្របកភ្នែក
• ការស្ងួតភ្នែកដោយសារមានរំហួតទឹកភ្នែកដូចជា៖
  • ការសម្លឹងកុំព្យូទ័រយូរម៉ោង
  • មើលទូរទស្សន៍ច្រើន ធ្វើការនៅក្រោមកំដៅថ្ងៃ ឬនៅក្នុងបន្ទប់ម៉ាស៊ីនត្រជាក់ ឬនៅក្រោមកង្ហារយូរម៉ោងជាដើម។

គួរបញ្ជាក់ផងដែរថា ក្នុងករណីដែលបងប្អូនមានបញ្ហាដូចខាងលើ សូមបងប្អួនធ្វើការពិគ្រោះជាមួយពេទ្យឯកទេស ដែលបងប្អូនទុកចិត្ត និងជិតផ្ទះបំផុតដើម្បីធ្វើការពិគ្រោះយោបល់ ក៏ដូចជាព្យាបាលជំងឺនេះ៕

ប្រភព៖ មន្ទីរពេទ្យកាល់ម៉ែត