ដំណេកល្អមានតួនាទីសំខាន់សម្រាប់សុខភាពរបស់យើង។ ដំណេកល្អជួយពង្រឹងការចងចាំ គ្រប់គ្រងអារម្មណ៍ បង្កើតគំនិតច្នៃប្រឌិត ជួយកោសិកាជួសជុលខ្លួនឯង និងជំរុញដំណើរប្រព័ន្ធការពាររាងកាយបានល្អ។ ដំណេកក៏ជួយសម្រួលប្រព័ន្ធមេតាបូលិក និងអាចកាត់បន្ថយហានិភ័យជំងឺចាស់វង្វេង(Alzheimer’s disease)។

ដំណេកត្រូវបានគ្រប់គ្រងដោយអ៊ីប៉ូតាលាម៉ុស (Hypothalamus) និងរងឥទ្ធិពលពីវដ្តទិនទិវា (circadian rhythm) និងលំនឹងដំណេក–ភ្ញាក់ (sleep-wake homeostasis)។ ប្រព័ន្ធទាំងនេះគឺទាក់ទងនឹងពន្លឺថ្ងៃដែលចូលតាមស្រទាប់រ៉េទីនរបស់ភ្នែកដើម្បីបញ្ឈប់ឬជំរុញការបញ្ចេញជាតិមេឡាតូនីន ការប្រែប្រួលសីតុណ្ហភាពរាងកាយ និងកំរិតអរម៉ូន គ័រទីសុលក្នុងឈាម។។ បើមានការរំខាន ឬការប្រែប្រួលក្ដីណាមួយ ការគេងលក់របស់យើងអាចរអាក់រអួលបាន។ ការសិក្សាបង្ហាញថាមនុស្សពេញវ័យប្រហែល ២០–២៨% មានបញ្ហាគេងមិនលក់។

ការពឹងផ្អែកលើថ្នាំ ជំរុញឲ្យគេងលក់ អាចបណ្តាលឲ្យរំខានប្រព័ន្ធធម្មជាតិ និងបង្កឲ្យញៀន។ ដូចនេះ ការព្យាបាលតាមវិធីផ្លាស់ប្តូរទម្លាប់ និងគំនិតវិជ្ជមាន (Cognitive Behavioral Therapy) គឺមានប្រសិទ្ធភាពខ្ពស់ជាង។

១. កំណត់កត្តារំញោច

• គួរចូលគ្រែតែពេលងងុយ
• កុំមើលទូរទស្សន៍ ឬទូរស័ព្ទលើគ្រែ
• ប្រសិនបើ ២០–៣០ នាទីមិនទាន់គេង ត្រូវចេញធ្វើអ្វីដោយស្ងប់ស្ងាត់ រហូតដល់ងងុយ
• ភ្ញាក់នៅម៉ោងដដែលរៀងរាល់ថ្ងៃ
• បង្កើតបរិយាកាសមុនគេង ដូចជា អានសៀវភៅ ឬងូតទឹកក្តៅ

២. បន្ថយម៉ោងនៅលើគ្រែ

• បន្ថយចំនួនម៉ោងនៅលើគ្រែ ដើម្បីធ្វើឲ្យការគេងមានប្រសិទ្ធភាព
• បន្ថែមម៉ោងនៅលើគ្រែបើប្រសិទ្ធភាពដំណេកកើនឡើង
• កែប្រែគំនិតអវិជ្ជមានអំពីការគេង
• ហាត់សមាធិ បន្ធូរសាច់ដុំ និងដកដង្ហើមជ្រៅៗ
• ប្រើវិធី “គោលបំណងផ្ទុយ” ដោយមិនបង្ខំខ្លួនឲ្យគេង
• កត់ត្រាការគេងរៀងរាល់ថ្ងៃ ដើម្បីឲ្យវេជ្ជបណ្ឌិតបណ្តុះបណ្តាលបន្ថែម

៣. កត្តាធ្វើឲ្យព្យាបាលជោគជ័យ

• ត្រូវការពេលវេលា និងភាពអត់ធ្មត់
• ពិភាក្សាជាមួយអ្នកជំនាញបើមានបញ្ហារអាក់រអួលផ្សេងៗ

ការផ្លាស់ប្តូរទម្លាប់ និងគំនិត ជាជំរើសព្យាបាលមានប្រសិទ្ធភាព និងប្រកបដោយសុវត្ថិភាពសម្រាប់បញ្ហាគេងមិនលក់ ជួយស្ដារឡើងវិញដំណេកធម្មជាតិ ដោយមិនចាំបាច់ពឹងផ្អែកលើថ្នាំ។ សូម​ប្រឹក្សា​ជាមួយ​គ្រូពេទ្យ​ជំនាញ​បើ​​អ្នក​ទាំង​អស់​គ្នា​កំពុង​មាន​បញ្ហា​នេះ៕

ប្រភព៖ មន្ទីរពេទ្យកាល់ម៉ែត